Eyrarlandsstofa, Lystigarðinum

Byggingarár: 1848.

Hönnuður: Þorsteinn Daníelsson forsmiður.

Breytingar: Húsið stóð þar sem nú eru bílastæði Fjórðungssjúkrahússins á Akureyri og var flutt inn í Lystigarðinn árið 1987.[1]

Friðað 1. janúar 1990 samkvæmt aldursákvæði 1. mgr. 36. gr. þjóðminjalaga nr. 88/1989.

Eyrarlandsstofa er einlyft timburhús með risþaki, 9,59 m að lengd og 5,42 m á breidd. Húsið stendur á steinsteyptum sökkli, veggir eru klæddir slagþili og þak rennisúð. Á húsinu eru sex krosspóstagluggar með sex rúðum; tveir á vesturhlið, einn á suðurstafni og þrír á austurhlið. Efst á hvorum stafni er fjögurra rúðu póstgluggi. Útidyr eru á austurhlið nærri miðju húsi og bakdyr á vesturhlið norðarlega.

Forstofa er inn af útidyrum, herbergi í norðausturhluta, stofa í suðurenda, forstofa og stigi inn af bakinngangi og snyrting er í norðvesturhluta hússins. Upp af stiga er geymsluloft og afþiljað herbergi við suðurgafl. Veggir á jarðhæð eru klæddir strikuðum panelborðum en snyrting er plötuklædd. Loft eru klædd plötum á milli klæddra bita. Veggir í risi eru klæddir spjaldaþili. Súð á geymslulofti er klædd skarsúð á sperrur og í suðurherbergi er listuð standsúð. Jarðhæð og suðurloft eru máluð að innan en geymsluloft bæsað.  Rishæð hússins er ófrágengin að innan.