Ketukirkja, Á Skaga, Skagafirði

Hönnuður: Árni A. Guðmundsson forsmiður og bóndi í Víkum á Skaga.

Saga

Ekki er ljóst hvenær kirkja reis fyrst í Ketu. Hún er nefnd í registri aftan við Auðunamáldaga frá 1318 en ekki getið að öðru leiti í máldagasafninu. Ekki er vitað hvaða dýrlingi kirkjan var helguð í kaþólskum sið. Keta var í eigu Hólastóls þar til hún var seld árið 1802 og var eftir það bændakirkja. Núverandi kirkja var byggð á árunum 1894-5 í stað torfkirkju sem hafði verið breytt í timburkirkju nokkrum árum áður en var orðin svo illa farin að ekki var messufært í henni. 

Friðuð 1. janúar 1990 samkvæmt aldursákvæði 1. mgr. 36. gr. þjóðminjalaga nr. 88/1989.

Lýsing

Ketukirkja er timburhús, 5,80 m að lengd og 5,15 m á breidd, með klukknaport við framstafn, 0,82 m að lengd og 1,12 m á breidd. Þakið er krossreist og bárujárnsklætt og járnkross upp af stafni. Framstafn er klæddur listaþili en aðrar hliðar slagþili og kirkjan stendur á steinhlöðnum og steinsteyptum sökklum. Á hvorri hlið kirkju eru tveir bogadregnir gluggar með átta rúðum. Krossreist þak er á klukknaporti og undir því hanga tvær klukkur. Tvær stoðir eru undir framhlið þess, ferstrendar að neðan og ofan en rúnnaðar á miðhluta. Fyrir kirkjudyrum er einföld hurð og um hana ávalir faldar.

Inn af dyrum er gangur og þverbekkir hvorum megin hans en veggbekkir í kór norðan megin. Yfir gluggum eru ávalir faldar og hnúður undir. Veggir eru klæddir strikuðum panelborðum. Strikaður listi er efst á veggjum uppi undir panelklæddri hvelfingu sem nær stafna á milli.

Heimild

Kirkjur Íslands, 5. bindi, Reykjavík 2005. bls 73 - 93