Súðavíkurkirkja, Súðavík

Byggingarár: 1899 og 1962.

Athugasemd: Flutt inn tilsniðin frá Noregi og reist á Hesteyri 1899.[1]

Hönnuður: Ókunnur, en yfirsmiður var Olaf Nielsen smiður.

Breytingar: Þegar kirkjan var smíðuð á Hesteyri 1899 var hún án kórútbyggingar og ferstrendur turn með píramítaþaki var upp af framstafni. Kirkjan var panelklædd að innan og í henni var hvelfing.[2]

Hesteyrarkirkja var tekin niður, flutt til Súðavíkur og Súðavíkurkirkja smíðuð upp úr henni 1962. Var kirkjunni þá breytt verulega að innan og forkirkjuturn smíðaður í stað þakturns.

Hönnuður: Embætti Húsameistara ríkisins.[3]

Kór smíðaður við kirkjuna 1988.

Hönnuður: Elísabet Gunnarsdóttir arkitekt.[4]

Friðuð 1. janúar 1990 samkvæmt aldursákvæði 1. mgr. 36. gr. þjóðminjalaga nr. 88/1989.

Súðavíkurkirkja er timburhús, 9,21 m að lengd og 6,70 m á breidd, með kór, 3,79 m að lengd og 5,31 m á breidd. Tvískiptur turn er við framstafn, 2,02 m að lengd og 3,63 á breidd. Á stöpli er risþak og á því mjór ferstrendur turn með krossreistu þaki. Hleri er fyrir hljómopi á hvorri turnhlið. Yfir kirkju og kór eru krossreist þök og gaflþak upp af kórbaki. Kirkjan er klædd láréttum plægðum borðum en þök bárujárni og stendur á steinsteyptum sökkli. Kjallari er undir kór. Á hvorri hlið kirkju eru þrír bogadregnir gluggar með átta rúðum en á hvorri hlið kórs er hár og mjór gluggi. Hvorum megin á stöpli er gluggi og annar á framhlið uppi yfir dyrum. Fyrir kirkjudyrum er spjaldsett hurð.