Skuldaþing í Skuldaþingsey við Skjálfandafljót

Starfsmenn Minjastofnunar fóru á dögunum í Skuldaþingsey á Fljótsbakka við Skjálfandafljót, en þar er að finna friðlýstan þingstað með a.m.k. 30 þingbúðum. Búðirnar eru þakktar þykku lyngi og afar þýft er á svæðinu. Þær falla því mjög inn í umhverfið og ekki auðvelt fyrir almenning að koma auga á þær á jörðu niðri. Þar má einnig sjá gamlan árfarveg sem skiptir svæðinu í tvennt. Starfsmenn flugu flygildi (dróna) yfir svæðið í u.þ.b. eina og hálfa klukkustund og úr varð þrívíddarlíkan af þingstaðnum forna sem hægt er að skoða á síðu stofnunarinnar: Þrívíddarlíkön Minjastofnunar

_{Við úrvinnslu loftmynda í gerð þrívíddarlíkana notar stofnunin forritið Reality Capture og hér fyrir ofan má sjá skjáskot úr forritinu ásamt einni loftmynd sem notuð var við gerð líkansins.}

Fyrir áhugasama bendum við á skýrslu um fornleifaskráningu í Skuldaþingsey og skýrslu um fornleifauppgröft á einni búðartóftinni, en samkvæmt niðurstöðum rannsóknarinnar var búðin byggð eftir árið 950 og notkun hennar löngu hætt árið 1477.

_{Víðmynd af minjasvæðinu.} 

_{Loftmynd af þingbúðum og gamla árfarveginum sem skiptir svæðinu í tvennt. Þar hefur fólk sennilega farið um bæði gangandi og á hestum að þingstaðnum. Ef vel er að gáð má sjá starfsmenn Minjastofnunar standa á hól ofarlega hægra megin á myndinni, en skyldi þetta vera þinghóllinn þar sem dómar voru kvaddir?}

Hér má einnig finna stutt myndband af þingbúðunum þegar flogið var yfir þingstaðinn: Skuldaþingstaður við Skjálfandafljót