Verkefni íslensks grunnskólanema eitt af tíu bestu í European Heritage Makers Week

Í vor stóð Minjastofnun Íslands fyrir Menningarminjakeppni grunnskólanna í tilefni af Menningararfsári Evrópu 2018. Menningarminjakeppnin er hluti af stærri viðburði Evrópuráðsins, European Heritage Makers Week. Í Menningarminjakeppnina bárust sjö verkefni frá tveimur skólum: Grunnskólanum á Drangsnesi og Grunnskóla Fjallabyggðar.

Úrslit í Menningarminjakeppni grunnskólanna voru tilkynnt fimmtudaginn 5. júlí og hreppti Magndís Hugrún Valgeirsdóttir, nemandi í 6. bekk í Grunnskólanum á Drangsnesi, fyrsta sætið. Vinningsverkefni Magndísar er þriggja mynda vatnslitasería sem sýnir ólíka þætti tilverunnar á hvalveiðistöðinni á Strákatanga við Steingrímsfjörð á meðan hún var starfrækt á sautjándu öld.

Öll verkefnin sem bárust í Menningarminjakeppnina voru send út í European Heritage Makers Week. Alls bárust þangað 82 verkefni frá átta löndum.

Nú hefur verið tilkynnt hvaða tíu verkefni í European Heritage Makers Week hafa verið valin bestu verkefnin af þeim 82 sem bárust og er verkefni Magndísar Hugrúnar Valgeirsdóttur eitt af þeim. Magndís hlýtur að launum ferð til Strassborgar í nóvember þar sem unga fólkið á bak við verkefnin tíu munu hittast, fara saman í skoðunarferðir og vonandi skapa saman nýjar sögur.

Á myndinni má sjá Magndísi Hugrúnu taka við verðlaunum fyrir fyrsta sæti í Menningarminjakeppni grunnskólanna. Með henni á myndinni eru Karitas H. Gunnarsdóttir, skrifstofustjóri menningarmála hjá Mennta- og menningamálaráðuneytinu, og Þór Hjaltalín, sviðsstjóri minjavarðasviðs hjá Minjastofnun Íslands.

Minjastofnun óskar Magndísi Hugrúnu innilega til hamingju með þennan frábæra árangur!

Hér má sjá heimasíðu European Heritage Makers Week.