24. desember - Keflavík í Hegranesi

Sumarið 2015 hófst uppgröftur á kirkjugarði úr frumkristni í Keflavík, Hegranesi í Skagafirði. Við uppgröftinn kom í ljós kirkja í miðjum kirkjugarðinum. Hún hefur verið timburkirkja með hornstoðum og torfvegg á tveimur hliðum. Timburgólf hefur verið í kirkjunni og mátti greina för eftir þverbita og gólfborð. Kirkjan hefur verið endurbyggð a.m.k. tvisvar, seinast í upphafi 12. aldar. Við rannsóknina kom í ljós að kórnum hefur verið bætt við kirkjuna einhvern tímann á fyrri hluta 11. aldar. Kirkjan stóð í miðjum hringlaga kirkjugarði sem var 15 m í þvermál. Kirkjugarðsveggurinn hefur verið úr torfi en hann hefur verið fjarlægður eða sléttað úr honum þegar garðurinn og/eða kirkjan voru aflögð. Alls fundust 50 grafir í garðinum sem innihéldu 46 beinagrindur, en fjórar grafanna höfðu verið tæmdar á 12. öld og beinin flutt úr þeim.

Rannsóknin er samstarfsverkefni Byggðasafn Skagfirðinga, Fiske Center for Archaeological Research og UMass Boston.

Stjórnandi: Guðný Zoëga, Byggðasafni Skagfirðinga.

Þessi færsla er unninn upp úr gögnum sem skilað er inn til Minjastofnunar við lok hvers rannsóknarárs.